Համակարգված ծրագիր․ 10 հանդիպում | 5 շաբաթ | 25 ժամ
Ինչո՞ւ է կարևոր դառնալ գիտակից ծնող։
Ոչ ոք մեզ չի սովորեցնում՝ ինչպես հարաբերություններ կառուցել մեր երեխաների հետ, ինչպես կառավարել մեր հույզերը, ինչպես չվնասել երեխային՝ նրան երջանկացնելու մեր հավերժ փորձերում։ Ծնող լինել մենք սովորել ենք մեր ծնողներից, տատիկ-պապիկից, մեր մանկության շրջանի այլ կարևոր մարդկանցից և նրանցից ընդօրինակել ենք ծնողավարման մոդելներ, որոնք այսօր կիրառում ենք մեր երեխաների հետ։ Մենք կա՛մ պատճենում ենք մեր «մեծերի» դաստիարակչական վարքագծերը, կա՛մ անում ենք ճիշտ հակառակը (որն իրականում ընտրություն չէ, այլ մետաղադրամի հակառակ կողմը), և երկու դեպքում էլ՝ առանց գիտակցելու։
Պատասխանատու և գիտակցված ծնողավարությունը.
- մեր՝ որպես հասուն անձի ամբողջ ներուժի օգտագործումն է՝ ծնողի առաքելության իրականացման գործում.
- երեխայի դաստիարակության նպատակների հստակ սահմանումն է.
- ծնողավարման մեր սեփական, եզակի մոդելի մշակումն է:
Դրա համար մեզ պետք են որոշ տեսական գիտելիքներ, արդյունավետ ծնողավարման գոյություն ունեցող մոդելների ուսումնասիրություն, սեփական մանկական փորձի վերլուծություն։ Մեզ անհրաժեշտ է գտնել այն ձևը, որը թույլ կտա չկրկնել մեր ծնողների ակամա արված սխալները, սովորել ինքնուրույն վերլուծել մեր կյանքի իրավիճակները և ընտրություն կատարել։ Ծնող լինել չի նշանակում ապահովել երեխայի կուշտ, հագնված և առողջ լինելը։ Գիտակցված ծնողավարումը նվիրում է մեզ գործիքներ՝ աջակցելու այս աշխարհ եկած փոքրիկ մարդու բացառիկության և ինքնատիպության արտահայտմանն առավել արդյունավետ և առողջ կերպով, օգնելու նրան զարգանալ իրեն հարմար տեմպով, լինել արարող, այլ ոչ սպառող, սովորել բացահայտել իր անձը, իր ներուժը, վայելել կյանքը և լինել երջանիկ։
Ո՞ւմ համար է դասընթացը
Այն ծնողների, ովքեր.
- գիտակցում են իրենց դերի կարևորությունն ու կշիռը երեխայի զարգացման գործում նրա կյանքի առաջին օրվանից և հավատում են, որ հենց իրենց ձեռքերում են երեխայի հետագա կյանքի վրա ազդելու հզորագույն լծակները,
- գիտակցում են իրենց երեխայի՝ որպես իրենցից անջատ, յուրահատուկ, արժեքավոր մարդու կարևորությունը,
- ողջունում են և պատրաստ են ամեն կերպ օգնել երեխային կյանքում կայանալ այնպիսին, ինչպիսին նա կա,
- գիտակցում են, որ հաշվելը, գրելը, սպորտով զբաղվելը լավ է և անհրաժեշտ, բայց ամենևին ոչ բավարար և հաստատ ոչ առաջնային,
- ուզում են տեսնել իրենց երեխային՝ որպես ինքնուրույն, հուզականորեն գրագետ, շրջապատի հետ շփվելու և հարաբերություններ կառուցելու, իր կարծիքը լսելի դարձնելու և սահմաններ դնելու ունակ մարդ, ով կարող է զգալ, հարգել, սիրել,
- փնտրում են իրենց ուրույն ուղին և ցանկանում են ստեղծել գիտակից և դրական ծնող դառնալու իրենց եզակի մոդելը։
Ինչո՞ւ հենց մեր ծրագիրը
Խնդիրը, որ մենք դնում ենք մեր առջև, ծնողների հետ առավելագույն համագործակցությունն է և երեխայի դաստիարակության հետ կապված բարդ ու գործնական հարցերի պատասխանները միասին գտնելն է։ Մեզ համար կարևոր է արդյունավետորեն համակցել ծնողավարության վերաբերյալ մանկավարժական (հոգեբանական) տեսությունը և գործնական հմտությունները։ Մենք մի կողմից փոխանցում ենք գիտելիքներ ծնողի դերի և հոգեբանության հիմնարար հասկացությունների մասին, մյուս կողմից՝ ծրագիրը խիստ գործնական է, որտեղ մասնակիցները փորձարկում են ստացված գիտելիքներն ու հմտությունները տանը՝ երեխաների հետ, ուսման առաջին օրվանից։ Եվ, ամենակարևորը, բոլոր ծնողների մասնավոր հարցումներն ու հուզող թեմաները հաշվի են առնվում և ազդում են ծրագրի բովանդակության վրա։
Ծրագրի հիմնական բովանդակություն
Թեմա 1. Ո՞վ է ծնողը և ի՞նչ խնդիրներ են դրված նրա առջև
Վերհանում ենք մեր պատկերացումները «լավ մայր, «լավ հայր» հասկացությունների մասին, բացահայտում ենք ռացիոնալ և իռացիոնալ համոզմունքները ծնողի դերի վերաբերյալ, վերլուծում ենք առասպելները «կատարյալ ծնողի» մասին։ Հասկանում ենք մեր՝ որպես ծնողի, նպատակները և խնդիրները, երեխաների հետ կապված մեր ակնկալիքները (երազանքները) և մտավախությունները (վախերը)։
Թեմա 2. Ինչպե՞ս մեծացնել երջանիկ և անկախ երեխա
Ծանոթանում ենք մարդու պահանջմունքներին, վերլուծում ենք հույզեր-զգացմունքներ թեման և հասկանում դրանց տարբերությունը (հուզական գրագիտություն), համեմատում ենք հույզերի վերապրումը երեխայի և մեծերի մոտ, խոսում ենք մանկական խանդի մասին։ Քննարկում ենք երեխայի անկախության և ինքնուրույնության սահմանները, բացահայտում ենք երջանիկ և ինքնուրույն երեխա մեծացնելու տասը կանոնները։
Թեմա 3. Երեխայի զարգացման փուլերը և դրանք առանձնահատկությունները
Ծանոթանում ենք երեխայի զարգացման փուլերին1, ամեն փուլի առանձնահատկություններն ու ծնողի անելիքներին, դրական և բացասական արձագանքներին, վերաիմաստավորում ենք մեր ամեն խոսքի, ժեստի, հայացքի, կեցվածքի, լռության ազդեցությունը երեխայի վրա՝ կախված նրա տարիքից։
Թեմա 4. Հաղորդակցման ձևերի ազդեցությունը երեխայի կյանքի ուղղության վրա
Բացահայտում ենք երեխայի կյանքի ուղղության ընտրության գործում ծնողի գրագետ և վնասող ազդեցության ձևերը, սկսում ենք տարանջատել երեխայի անձը նրա վարքից։ Պարզում ենք բանավոր (վերբալ), հարբանավոր (պարավերբալ) և ոչ բանավոր (ոչ վերբալ) ուղերձների ազդեցությունը երեխայի կյանքի և որոշումների վրա։ Վերլուծում ենք երեխայի անձի ձևավորման վրա ազդող այլ գործոնները (գենետիկա, կրթություն, միջավայր):
Թեմա 5. Երջանկություն, վստահություն, սեր
Վերաիմաստավորում ենք էթիկական և բարոյական արժեքների կարևորությունը հասուն մարդ ձևավորելու գործում։ Սահմանում ենք երջանկության, վստահության և սիրո մեր անհատական բանաձևերը և մշակում դրական, պատասխանատու և երջանիկ ծնող լինելու մեր անհատական մոդելը։
————————————————
Ծրագրի հեղինակը հոգեբան, հոգեթերապևտ Դիանա Յուդինան է (Սանկտ-Պետերբուրգ, Ռուսաստան)։ Այն հիմնված է հոգեբանության գլխավոր ուղղություններից մեկի՝ տրանզակտ վերլուծության փիլիսոփայության և մոտեցումների, ինչպես նաև հեղինակի 18 տարվա մասնագիտական փորձի վրա։ Ծնողի դպրոցին տրված են այս ծրագիրը Հայաստանում օգտագործելու բացառիկ իրավունքները։
————————————————
Օրեր
Շաբաթը երկու օր, մեկը՝ աշխատանքային երեկոյան, մյուսը՝ շաբաթ։ Վերջնական օրերն ու ժամերը ենթակա են քննարկման խմբի մասնակիցների հետ։
Դասընթացի տևողությունն և ծավալը
- 5 շաբաթ, շաբաթը 2 հանդիպում
- 10 հանդիպում 2․5-ից 3 ժամով
- 25 ժամ ընդհանուր աշխատանք
Փոքր խմբեր
- 10 մասնակից
- 2 դասընթացավար
Արժեք
68․000 դրամ
Ընդհանուր՝ 25 ժամ
Արժեքը ներառում է նաև թեյ-սուրճի ընդմիջումը, աշխատանքի համար բոլոր անհրաժեշտ նյութերը, լրացուցիչ արժեքավոր տպագիր նյութեր։
Եթե դասընթացի ավարտին մասնակիցը այն գնահատում է՝ որպես անարդյունավետ / ոչ օգտակար, մենք վերադարձնում ենք գումարը։
Նախնական հայտ թողնելու համար և հարցերի դեպքում գրեք կամ զանգեք մեզ՝ info@parenting.am, 094 224 223։